Archives

now browsing by author

 

Deseucaliptización simultánea no Día Mundial dos Bosques

A rede a prol do bosque galego, Cousa de Raíces, na que se integran Verdegaia e outras entidades colaboradoras das Brigadas Deseucaliptizadoras, ven de facer un chamamento a celebrar o Día Mundial dos Bosques cunha “Deseucaliptización Simultánea” por toda Galiza. Esta plataforma, conformada por máis de 60 entidades, convida a centros educativos, colectivos, asociacións, plataformas e particulares a promover iniciativas de eliminación de eucaliptos e doutras plantas invasoras dos montes galegos durante a vindeira semana,  con motivo do Día Internacional dos Bosques.

vindeiro xoves, 21 de marzo, é o Día Mundial Forestal ou dos Bosques, declarado así pola Asemblea Xeral das Nacións Unidas para homenaxear a importancia de todos os tipos de bosque e xerar conciencia ao respecto, no plano individual e colectivo, instando tamén ás administracións públicas a promover iniciativas que favorezan, protexan e respalden os bosques. Estes achegan á sociedade múltiples beneficios: mitigan o cambio climático, reteñen carbono, favorecen a provisión de auga, xean biodiversidade e paisaxe, son fundamentais para a conservación da natureza, ofrecen oportunidades para o desenvolvemento económico e son fundamentais para a vida.

O lema escollido este ano polas Nacións Unidas para celebrar o Día Mundial Forestal é “Aprende a amar o bosque”, mais consideramos que o primeiro será distinguir o que é un bosque do que non o é. Mentres que un “bosque” é un ecosistema natural complexo, dominado por especies arbóreas e a súa vexetación acompañante, no que habitan animais, fungos e microorganismos entre os que se establecen interrelacións perdurables no tempo; unha “plantación forestal” é un conxunto de árbores normalmente uniformes que se plantan unicamente polo seu interese comercial, e que adoita estar formado por especies alóctonas que non establecen interrelacións perdurables coas especies autóctonas. As plantacións de especies alóctonas (nomeadamente, as invasoras e dominantes) causan un forte impacto negativo sobre as especies forestais propias, o solo, os cauces fluviais, a biodiversidade e contribúen a favorecer os incendios forestais. É caso das superficies ocupadas co xénero Eucalytus, que a día de hoxe xa supera as 500.000 hectáreas, o que representa o 17% do total da superficie galega.

LISTA PROVISIONAL DE ACCIÓNS DE DESEUCALIPTIZACIÓN

Na táboa de abaixo, indicamos algunhas das propostas que xa se sumaron á “Deseucaliptización Simultánea 2019” de Cousa de Raíces, e nas que xa te podes apuntar para participar, contactando coas entidades promotoras a través dos teléfonos e mails que se sinalan.

Tamén podes consultar estes datos premendo sobre as localizacións das accións que se sinalan no mapa preliminar da “Deseucaliptización Simultánea 2019”: https://drive.google.com/open?id=1MgSqHOhuNT-w2PDZvQDV_E-oKXDSE2nH&usp=sharing

Imos deseucaliptizar o país!!! Vémonos no monte!

Táboa deseucaliptización simultánea 2019 -(II)

Colabora coas Brigadas Deseucaliptizadoras facéndote cun exemplar da novela «O Coala»

Na procura de dar continuidade ao traballo feito até agora polas Brigadas Deseucaliptizadoras, en Verdegaia queremos anunciar e agradecer a iniciativa de Daniel Ugarte, autor da novela O Coala, recentemente publicada por Edicións Do Peirao. Daniel ofreceuse a doar ao proxecto das Brigadas un euro por cada exemplar da novela vendido.

“Pareceume un bo xeito de vincular a obra coa realidade na que se insire”, explicounos Daniel. “Tamén de darlle visibilidade, claro. Tanto á novela como ao problema forestal que temos en Galicia.” O Coala conta a historia de Thomas Reed, un mozo galés que se traslada coa súa familia a Galicia para traballar como profesor de inglés nun colexio privado de Santiago de Compostela. Pouco despois da súa chegada, Thomas será testemuña dun acontecemento que crebará a convivencia da sociedade galega en tempos de crise: a misteriosa aparición dun coala nunha antiga carballeira, transformada agora en eucaliptal.

“A miña intención era parodiar a relación que temos as galegas e os galegos coa nosa lingua, co territorio, coa nosa cultura, en suma. E quería tamén que todo iso fose presentado desde os ollos dun estranxeiro, para conseguir certa distancia e non caer en visións excesivamente simplificadoras da realidade”, relata o autor.

Desde as Brigadas Deseucaliptizadoras saudamos esta proposta na que o patrimonio natural e cultural danse a man e animámosvos a que coloquedes O Coala na vosa lista de próximas lecturas. A novela xa está dispoñíbel na páxina web de Do Peirao e pronto o estará tamén en librarías de toda Galicia. Para animarvos a coñecer tanto o tema como o tono da novela, Daniel partilla en exclusiva coas Brigadas dous capitulos do inicio do libro.

O 23 de febreiro súmate á desacaciación do Ribeiro!

O sábado 23 de febreiro botámonos novamente ao monte na aldea de Lentille, concello de Cenlle (Ribeiro) pra atacar a invasión de mimosa (Acacia dealbata) que sofre a comarca. Nesta roga continuaranse os traballos iniciados no mes de maio de 2018 nunha zona que levaba en estado de abandono desde a década de 1970. Os actuais propietarios pretenden recuperar os valores naturais da mesma así como os canais e pozos de rego antigos, coa súa biodiversidade asociada. A intervención manual terá como obxectivo eliminar os pés de acacia mantendo as árbores autóctonas que conseguiron sobrevivir (carballos, érvedos, etc.).

Para participar nesta acción é imprescindíbel en primeiro lugar estar inscrita como Brigadista no proxecto, o que se pode facer por medio deste formulario, e ademais de indicar o compromiso expreso de acudir á convocatoria do 23 de febreiro mediante correo a brigadas@verdegaia.org Á vista do número de ausencias inxustificadas na intervención do pasado 2 de febreiro en Froxán, agradecemos que aquelas brigadistas que non poidan garantir a súa asistencia se absteñan de apuntarse, dado o gasto e desperdicio de comida que supoñen as cancelacións ou inasistencias. A data límite para apuntarse é o 18 de febreiro para poder organizar ben a comida e demais loxística.

Comezaremos os traballos ás 10 da mañá e pararemos para o albaroque por volta das 14:30, regado cos excelentes viños e licores do Ribeiro aos que nos ten (mal) acostumadas a Brigada da comarca. A roga non se suspenderá en ningún caso, mesmo que chova, polo que vinde preparadas por se fai mal tempo: non existe tempo ruín, só roupa inadecuada. Se tedes reparos en vir a unha brigada mollada aforrade a empada 😉 Despois do albaroque, na parte da tarde, haberá convivio e a posibilidade de visitar a área conservada pola Asociación Ridimoas, do outro lado do val, que será escenario da próxima intervención das brigadas.

2 de febreiro: 1000 árbores autóctonas para Froxán

O día 2 de febreiro celebramos o Día Mundial das Zonas Húmidas, que conmemora a adopción en tal día do ano 1971 da Convención RAMSAR para a protección dos humedais. Durante 2018 varias intervencións das Brigadas centráronse na eliminación de especies exóticas invasoras da contorna da zona húmida de “Campo de Lamas” e o 2 de febreiro facilitaremos a recuperación do bosque nativo nesta zona da Área Conservada pola Comunidade Local de Froxán, en Lousame, recoñecida como ICCA (Indigenous and Community Conserved Areas) polo programa das Nacións Unidas para o Ambiente.

A intervención guíase por un plan de xestión e recuperación ambiental que foi seleccionado como un dos catro casos piloto para a guía “Cómo planificar los proyectos de custodia para adaptarse al cambio climático en las regiones vulnerables de España”, e que podedes coñecer en detalle aquí. Segundo un estudo elaborado por investigadoras da Universidade de Santiago de Compostela, Campo de Lamas é unha turbeira mineroxénica mixta de alveolo e de surxencia e, como tal, un importante reservorio de carbono.

Como sempre, ademais de estar previamente inscritas como brigadistas, para vos anotar para esta roga precisades enviar un correo electrónico a brigadas@verdegaia.org até o dia 29 de xaneiro. Todas a brigadistas participantes deberán estar puntualmente en Froxán ás 9:30, no punto de encontro habitual e finalizaremos ás 14:00 para gozar xuntas do xantar de albaroque. Lembrade que roga non se suspenderá en caso de chuva ou outras inclemencias: non existe tempo ruín, só roupa inadecuada 😉

Nesta ocasión, queremos agradecer especialmente o apoio da European Outdoor Conservation Association polo seu apoio continuado á recuperación da ICCA Froxán do viveiro VIFORSA, por facer unha xenerosa doazón de planta autóctona identificada para restaurar as zonas degradadas por especies exóticas invasoras.

Vémonos no monte o 2 de febreiro!

«Deseucaliptización» é a Palabra do Ano 2018

Durante o alboroque da roga deseucaliptizadora celebrada en Froxán o pasado 8 de decembro, alguén propuxo que deseucaliptización era a palabra do ano. E desde logo para toda a xente implicada nas Brigadas foino! Tamén se propuxo, medio en serio, medio a brincadeira, que se debía propor formalmente na iniciativa “Palabra do Ano” do Portal das Palabras. Dito e feito. Unha semana despois, e grazas ás vosas propostas, “deseucaliptización” foi seleccionada como unha das 6 finalistas.

Logo veu unha votación pública aberta que finalizou o 25 de decembro. Deseucaliptización sumou 3.114 votos, máis da metade dos 5.724 votos emitidos, e así foi proclamada hoxe “Palabra do Ano 2018”. A propia “proclama” revela o que hai detrás deste resultado e de iniciativas como as Brigadas deseucaliptizadoras: “a vencedora apela ao desexo de recuperación da masa forestal autóctona cando a plantación e reforestación indiscriminada dos eucaliptos provoca cada vez máis rexeitamento, tanto pola pegada que deixan na paisaxe como polo seu impacto na biodiversidade e outros problemas asociados á súa proliferación“. Nesta ligazón podedes saber máis sobre a orixe desta palabra e na web das Brigadas recompilamos todas as noticias sobre as Brigadas aparecidas desde o pasado mes de abril.

Para o celebrar e axudar a levar esta palabra aínda máis lonxe en 2019, vimos de por en andamento unha campaña de micromecenado en Teaming a través da cal calquera persoa pode facer unha doazón mensual recurrente de 1 euro ao longo do próximo ano. As doazóns axudarán a sufragar os gastos de seguros (responsabilidade civil e accidentes), adquirir árbores e ferramentas para as intervencións, dotar ás brigadas de equipos de seguranza e protección (roupa anticorte para motoserristas, luvas, …) e sufragar os albaroques cos que se premia o esforzo das brigadistas. A plataforma Teaming non aplica ningunha comisión, de modo que o 100% das doazóns van directamente para as brigadas e, ademáis, implican unha deducción fiscal de ata 50% no IRPF (i.e, a túa doazón de 12 euros anuais desgravará 6 euros na declaración do IRPF). Agradecemos que nestas datas convidedes ás vosas coñecidas e amigas a apoiar o proxecto das Brigadas, facéndose brigadistas, achegando novos terrenos ou facendo doazóns.

Deseucaliptizamos a senda arqueolóxica de Amoedo o 12 de xaneiro

As Brigadas deseucaliptizadoras estréanse no Monte Veciñal en Man Común de Amoedo (Pazos de Borbén) o 12 de xaneiro. As zonas a deseucaliptizar están enmarcadas nunhas 30 hectáreas, aínda que as actuacións centraranse no entorno da Senda Arqueolóxica de Amoedo, que comezou a súa andaina no 2011 e que pon en valor máis de 80 petróglifos e 20 mámoas. Para a intervención da Brigada do día 12 de xaneiro é imprescindíbel estar puntualmente ás 09:30 na Casa Cultural de Amoedo, sendo necesario apuntarse ata o día 8 de xaneiro. Despois da comida de albaroque e se o tempo acompaña e temos guía, realizaremos un roteiro pola propia senda arqueolóxica e descubriremos o importantísimo patrimonio que acolle.

As parcelas que serán obxecto da intervención están situadas fóra dos núcleos poboacionais e caracterízanse por un terreo chan ou con desniveis suaves na súa maior parte. O estado actual das mesmas e de “semidesertificación” acusado de niveis altos de erosión en algúns puntos ou de monte raso noutros debido aos incendios de 2017, incendios que xa sufrira a mesma Comunidade no 2006. O peor destes incendios é que os eucaliptos se expanden con forza polas zonas onde antes non había ou había poucos, xa que no 2006 xa se realizara unha retirada desta especie invasora-pirófila-pirófita dos montes de Amoedo.

As zonas comprendidas entre Cepeda e Amoedo, que comprendern a bacía húmida de Valongo e As Laghoas entre os montes da Serra e o Buxel, así como as chás e outeiros dos montes do Pedroso e do Espiño, con lugares como A Matanza, A Rabadeira, Veighiña Longa, Léghoa Seca ou o Regheiriño polo norte, representan un valor arqueolóxico e natural extraordinario. Entre os elementos etnográficos destacan tamén o Foxo do Lobo no río Alvedosa, así como un grupo importante de construcións do ciclo da auga que comprenden pozas, regos, levadas, muíños, lavadoiros e fontes. Todos eles reflexo da asisada organización do complexo rural agrogandeiro galego sen solución de continuidade neste novo século.

Última roga do ano: 8 de decembro en Froxán (Lousame)

Queremos dar a despedida a este primeiro ano brigadista onde comezamos en abril: no monte veciñal en man común de Froxán (Lousame), primeiro a ser recoñecido polo Programa das Nacións Unidas para o Ambiente como Área Conservada por Pobos Indíxenas e Comunidades Locais (ICCA). Ven despedir o ano connosco o sábado 8 de decembro eliminando eucaliptos nun espazo de grande valor natural: a zona húmida de Campo de Lamas, unha braña higro-turbosa que acolle un hábitat de interese comunitario prioritario de queirugal húmido e que cuxo plan de xestión foi seleccionado dentre cinco de todo Estado entre proxectos de adaptación ao cambio climático. Se queres saber todo sobre o lugar antes de vir podes descargar o Plan de Xestión íntegro aquí.

Segundo un estudo elaborado por investigadores da Universidade de Santiago de Compostela, Campo de Lamas é unha turbeira mineroxénica mixta de alveolo e de surxencia. Tres dos seis puntos das mostras tomadas a unha profundidade de entre 25 e 60 cm mostraron valores de C orgánico superiores ao mínimo asumido (15%) e o perfil completo, nun dos puntos, valores superiores a éste desde 60 cm de profundidade ata a superfície.

Como sempre, precisamos que vos apuntedes enviando un correo electrónico a brigadas@verdegaia.org até o dia 5 de decembro. Lembrade que é a semana da ponte e que teremos tempo moi xusto para facer as encomendas de comida. Avísanos tamén se tes algunha necesidade ou preferencia alimentaria especial, que tentaremos atender. Comezaremos os traballos ás 10 da mañá polo que precisamos que estexades todas en Froxán ás 9:30, no punto de encontro habitual (que vos comunicaremos uns días antes) e finalizaremos ás 14:00 para gozar xuntas dun albaroque digno destas datas regado unha vez máis cos excelentes viños e licores do Ribeiro.

Durante a sobremesa e tarde, queremos ademais de brindar polas xa máis de 300 brigadistas que facedes parte deste proxecto, recapitular todo o traballo feito nos últimos meses e decidir xuntas como podemos ir máis alá e mellorar en 2019. É bo momento para compartir, distribuir e asumir tarefas e desafíos para o ano que entra, e facer así das Brigadas un proxecto de todas nós e moitas máis!

A roga non se suspenderá en caso de chuva ou outras inclemencias, así que vide preparadas para calquera escenario. Vémonos no monte!

O monte de Froxán precisa de ti este 18 de novembro!

Esta fin de semana hai roga dobre: o sábado 17 no Ribeiro (inscricións pechadas) e o domingo 18 en Froxán (inscrición aberta ata o venres 16). Non perdas estes días de sollío para vir eliminar Acacia e Eucalipto cunha nova roga e albaroque na Área Conservada pola Comunidade Local de Froxán, en Lousame, recoñecida como ICCA (Indigenous and Community Conserved Areas) polo programa das Nacións Unidas para o Ambiente. Como sempre, despois dos traballos colectivos no monte (roga), premiarase as brigadistas asistentes cun xantar de convivio (albaroque).

Os traballos nesta xornada centraranse na eliminación de rebrotes de eucalipto e acacia, nas zonas onde continuaremos facendo plantacións de frondosas autóctonas con centros educativos nos próximos meses. Precisamos que vos apuntedes mediante un correo electrónico a brigadas@verdegaia.org e que estexades puntualmente ás 10 da mañá no punto de encontro (Google Maps) para irmos xuntas á zona da intervención. Agradécese que nos notifiquedes se tendes algún requerimento alimentario especial para tentar que no albaroque haxa algo para todo o mundo.

Nova brigada desacaciadora no Ribeiro o 17 de novembro

O sábado 17 de novembro botámonos novamente ao monte na aldea de Lentille, concello de Cenlle (Ribeiro) pra atacar a invasión de mimosa (Acacia dealbata) que sofre a comarca. Nesta roga continuaranse os traballos iniciados o pasado mes de maio nunha zona que levaba en estado de abandono desde a década de 1970. Os actuais propietarios pretenden recuperar os valores naturais da mesma así como os canais e pozos de rego antigos, coa súa biodiversidade asociada. A intervención manual terá como obxectivo eliminar os pés de acacia mantendo as árbores autóctonas que conseguiron sobrevivir (carballos, érvedos, etc.) para así introducir este mesmo inverno froiteiras bravas.

Para participar nesta acción é imprescindíbel en primeiro lugar estar inscrita como Brigadista no proxecto, o que se pode facer por medio deste formulario, e ademais de indicar o compromiso expreso de acudir á convocatoria do 17 de novembro mediante correo a brigadas@verdegaia.org O límite de persoas participantes fíxase en 30 para facilitar os traballos de modo que se irán cubrindo por orde de inscrición. Agradécese que nos notifiquedes se tendes algún requerimento alimentario especial para tentar que no albaroque haxa algo para vós. A data límite para apuntarse é o 13 de novembro para poder organizar ben a comida e demais loxística.

Comezaremos os traballos ás 10 da mañá e pararemos para o albaroque por volta das 14:00, regado cos excelentes viños e licores do Ribeiro aos que nos ten (mal) acostumadas a Brigada da comarca. A roga non se suspenderá en caso de chuva, polo que vinde preparadas por se fai mal tempo. Despois do albaroque, na parte da tarde, haberá foliada e, se a climatoloxía o permite, un novo roteiro descobrindo os tesouros patrimoniais da contorna.

Continúa a Brigada deseucaliptizadora de Corcubión

O pasado sábado 27 de outubro, os membros da Asociación “Boca de Sapo” de Corcubión, acudiron ao “Prado Cambeiro” para continuar coas labores de tala de eucaliptos e conservación desta parcela. Trátase dun terreno de propiedade municipal situada xusto sobre a vila, e que cunhas 2 hectáreas e orientación leste, sirve de finca piloto para a posta en andamento das Brigadas en Corcubión.

Apenas quedan xa eucaliptos e agora, na próxima actuación, temos que traballar na eliminación de Acacia dealbata (mimosas) existentes na parte alta da braña, traballo ben tedioso polo alto grao de concentración deste tipo de especie que fan unha matogueira moi tupida e dificil. Tamén fixemos traballos de agrupación da valumada e limpeza de polas dos eucaliptos que se talaron.

Seguiremos adiante co plan de rexeneración da finca, do que iremos informando conforme vaiamos progresando nos traballos. Está previsto plantar castiñeiros, carballos, froitais… no vindeiro mes de xaneiro, e para iso tamén temos a colaboración dun veciño da finca, Manolo Canosa, que nos permite utilizar o seu terreo para facer un sementeiro. Preténdese implicar ademais os rapaces e rapazas do CEIP Praia de Quenxe de Corcubión para que veñan plantar na altura certa.

Un saúdos a tódolos/as “Brigadistas”, dende Corcubión.

Francisco Santiago López, membro da Asociación “Boca de Sapo” de Corcubión

Noticia en Que pasa na costa.

© 2019: Brigadas deseucaliptizadoras | GREEN EYE Theme by: D5 Creation | Powered by: WordPress