Primeira xornada das Brigadas Deseucaliptizadoras en Lousame
- Detalles
- Publicado o Venres, 20 Abril 2018 17:15
- Visitas: 517
Mañá sairá ao monte a primeira Brigada deseucaliptizadora. Será no monte de Froxán, Lousame.
Agradecemos a xenerosidade de tódalas persoas que se anotaron para formar parte desta primeira brigada.
A cita será ás 10 da mañá, neste punto, onde poderedes estacionar sen problema, ao pe dun gran eucalipto mesmo antes de entrar na aldea pola parte norte.
Comezaremos os traballos de mañá ás 10.30 neste outro lugar, ben perto da aldea. Alí machacaremos manualmente brotes de eucalipto e plantaremos frondosas autóctonas sobre un eucaliptal que foi rozado mecanicamente pola comunidade.
Sobre as 13.30 pararemos para xantar, de volta na aldea.
O eucalipto Eucalyptus globulus é unha especie exótica invasora en Galicia
- Detalles
- Publicado o Martes, 17 Abril 2018 12:53
- Visitas: 465
A consideración do eucalipto Eucalyptus globulus como especie exótica invasora en Galicia non tiña suscitado maior dúbida, existindo un consenso xeralizado entre os científicos e profesionais que traballan na conservación da biodiversidade1. Aínda nos últimos anos, o que se ten é fornecido ese carácter invasor con novas e mais robustas evidencias2. Non coñecemos aportación científica algunha que negue o carácter invasor do eucalipto en Galicia.
Esta argumentación científica probablemente non pareceu excesivamente preocupante para os sectores económicos que dependen do eucalipto, alguns dos cales mesmo asumiron ese carácter invasor, xustificando o seu uso nun suposto correcto manexo. Porén, o asunto mudou en datas moi recentes, cando se ten promovido a inclusión desta e doutras especies do xénero Eucalyptus no Catálogo español de espécies exóticas invasoras (CEEEI, regulado polo RD 630/2013), e especialmente cando o Comité Científico do Ministerio de Medio Ambiente ten emitido um dictame3 aconsellando a inclusión de seis especies de eucaliptos en dito Catálogo.
A consideración de espécie exótica invasora no CEEEI conleva a prohibición xenérica de posesión, transporte, tráfico e comercio de exemplares vivos ou mortos, dos seus restos ou propágulos, incluindo o comercio exterior (art.7.1). No entanto, todas as árbores con potencial de ter aproveitamento silvícola, caso da acacia negra (Acacia melanoxylon) e da robinia ou falsa acacia (Robinia pseudoacacia) -especies das que a propia Xunta ten promovido actuacións puntuais de eliminación debido ao seu carácter indiscutiblemente invasor-, foron deliberada e inxustificadamente excluídas do Catálogo. Se ficaron fóra esas árbores ferozmente invasoras, que apenas contan con aproveitamento económico na actualidade..., como imaxinar que podería ser catalogado o eucalipto?
As brigadas deseucaliptizadoras bótanse ao monte
- Detalles
- Publicado o Martes, 10 Abril 2018 06:00
- Visitas: 539
Hai uns días recibíamos a boa nova de que a candidatura presentada conxuntamente pola Sociedade Histórica e Cultural Coluna Sanfins, a Comunidade do Monte Veciñal de Froxán e Verdegaia ao programa de axudas a proxectos de conservación da EOCA de axudas e proxectos de conservación resultaba ganadora na categoría de forestal.
Desde Verdegaia queremos mostrar o noso agradecemento público a tódalas persoas que apoiaron esta iniciativa votándoa e divulgándoa, e facendo así posible este éxito.
Hoxe queremos anunciar tamén o lanzamento público do proxecto de Brigadas deseucaliptizadoras promovido por Verdegaia.
O próximo sábado 21 de abril botámonos ao monte, coa nosa primeira xornada de traballo. Será na Área Conservada pola Comunidade Veciñal de Froxán, en Lousame.
Esta intervención, a primeira das programadas en Froxán, levarase a cabo en varios hábitats de interese comunitario e interese prioritario, e realizarase de maneira sinérxica coas iniciativasde restauración de hábitats degradados promovidas pola Comunidade do Monte Veciñal en Man Común de Froxán e a Sociedade Histórica e Cultural «Coluna Sanfins».