Archives

now browsing by author

 

3-M e 9-M: Novas plantacións de árbores frondosas en Froxán (Lousame)

As plantacións forman parte do proxecto “Comunidades Activas e Paisaxes Resilientes a Incendios Forestais e Cambio Climático”, no que participa Montescola

Montescola convoca dúas novas plantacións de árbores frondosas autóctonas na Área Conservada pola Comunidade de Froxán, en Lousame, para o domingo 3 de marzo e o sábado 9 de marzo. Coas plantacións búscase crear un cortalumes verde como parte das actividades do proxecto “Comunidade Activas e Paisaxes Resilientes a Incendios Forestais e Cambio Climático”, no que participa Montescola.

A plantación do domingo 3 está pensada para crianzas e as súas familias, e comezará ás 10 da mañá, tendo prevista a ecolóxica presenza das criaturas do bosque que ofrecerán a súa apócema ao final. As prazas son limitadas e agradecémosvos confirmar a vosa participación indicando número de crianzas e adultas até este venres día 1 enviando un email a info@montescola.org

A plantación do sábado día 9 está aberta a todos os públicos e a todas as idades e nela plantaremos castiñeiros nunha zona na que se está combatindo a presenza de acacia. Partiremos para a zona de traballos ás 9:30. En paralelo organizaremos un obradoiro de poda forestal. Podedes apuntarvos no mesmo email até o xoves 7 de marzo. Nesta intervención, ofrecerase o tradicional xantar de albaroque ao finalizar os traballos.

En ningún dos dous casos se suspendará a xornada en caso de chuva, así que apuntádevos só se tedes roupa de augas 😉

VÉMONOS NO MONTE !!!

 

2 de marzo: Roga simultánea de eliminación de especies invasoras en Lentille e Ferrol

Marzo comeza con dúas rogas simultáneas o sábado día 2 en Ferrol e Lentille, é a túa escolla, mais non podes faltar!

LENTILLE (O RIBEIRO)

A Asociación Veciñal de Lentille convoca as Brigadas Desacaciadoras para unha nova actuación de control de mimosa (Acacia dealbata) na aldea o sábado 2 de Marzo. Desta volta  comezaremos retirando e organizando a ramallada que ficara estrada da última convocatoria e que as constantes chuvias do inverno non permitiran retirar nin queimar. Tamén insistiremos en liberar camiños invadidos pola mimosa.

Para vos apuntardes é imprescindible (alén de estardes inscritos como brigadistas) remitir un email para avlentille@gmail.com até o 28 de Febreiro a máis tardar, comprometendo asistencia.

O punto de encontro será o habitual no Souto e desde alí repartirémonos en grupos e endereitaremos cara as áreas de traballo. Teredes que estar alí ás 9:30 puntualmente.

Disporemos auga fresca e uns petiscos a media mañán con café, froita e unhas madalenas. Remataremos contra as 14:00 pra xantarmos. O albaroque acontecerá na terraza do Cabildo se o clima concorda, e se non habilitaremos o garaxe.

MONTES DO CHÁ (FERROL)

A Asociación Comuneiros do Chá convócanos a erradicar os pés de Helichrysum petiolare que ameazan invadir unha zona repoboada e outra de pasto dos cabalos. O helicrysum petiolare é unha especie orixinaria de Sudáfrica, trátase dun arbusto ramoso e gabeador que afoga toxeiras e mesmo especies arbóreas formando masas monoespecíficas e que na boca da ría de Ferrol hai anos que constitúe un problema ambiental de primeira magnitude ante a pasividade das administracións.

A técnica de erradicación é sinxela e básicamente manual polo que é moi importante que as persoas voluntarias traian luvas preferentemente de coiro pois no terreo hai brotes de toxos mesturados cos helichrysum a erradicar. Se alguén prefire usar sacho pode traelo ou usar os que a organización poñerá á disposición d@s voluntari@s.

Trátase dun traballo sinxelo nun terreo de pouca pendente e desbrozado (nalgunhas zonas recentemente e noutras hai dous anos) polo que a xornada é perfectamente apta para crianzas e persoas maiores. Se hai tempo faranse labores de mantemento de plantacións de anos anteriores e un roteiro polas mámoas do monte e o recinto dos cabalos.

O punto de encontro será ás 9:30 h no Viso (Entre san Cristobal e Martín) hai unha explanada onde deixaremos os coches, fronte a ela un camiño que sube ó Chá e a 500 m comeza a zona de actuación.

Para apuntarse é imprescindible, ademáis de estar inscrit@ como brigadista  mandar confirmación ó correo comunidademontesdocha@gmail.com  antes do xoves 29 de febreiro.
Tras a actuación sobre as 14:00 h a organización convidará ás persoas participantes a un xantar colectivo na AV de Valón, para iso cada persoa deberá traer o seu propio vaso, plato e cubertos, quen teña algún tipo de restricción alimentaria que avise no momento de apuntarse.

VÉMONOS NO MONTE !!!

A tua doazón conta!

Serán moi benvidas as doazóns voluntarias e fiscalmente deducíbeis ao proxecto por medio da plataforma Teaming.

O exemplo de actuación das Brigadas nun novo artigo de investigación no libro Wattles: Australian Acacia Species Around the World

A publicación Wattle: Australian Acacia Species Around the World publicado en 2023 e dirixido por David M. Richardson, Johannes J. Le Roux, e Elizabete Marchante recolle o artigo Management of Invasive Australian Acacia Species: Contributions from Citizen Science, Volunteer Groups and Public Awareness Raising da autoría de Hélia Marchante, Nolwethu Jubase-Tshali, Aníbal Pauchard, David M. Richardson, e Elizabete Marchante.

O libro ofrece unha visión xeral do coñecemento actual sobre máis de 1000 especies de árbores e arbustos do xénero Acacia, a maioría nativas de Australia. Examina a bioloxía, a ecoloxía, a evolución e a bioxeografía das acacias nas súas áreas nativas, incluíndo as forzas evolutivas que impulsaron a especiación e a adaptación pasadas a diversos ambientes, o estado de conservación, os usos e as percepcións humanas destas especies. Considera diferentes historias de introducións e proliferación como especies exóticas en diferentes partes do mundo desde 1850, situados dentro de contextos políticos, socioeconómicos e científicos relevantes, xunto cunha análise de como cambiou a conciencia dos seus impactos como especies invasoras ao longo do tempo. Revísanse as diferenzas nas dinámicas e tendencias asociadas á introdución, naturalización e invasión en diferentes partes do mundo. O libro tamén sintetiza a distribución global das acacias utilizando diversas fontes de datos, xunto con tendencias, patróns e proxeccións dos usos globais das especies de acacias. Analiza a xenética, as interaccións bióticas e os impactos ecolóxicos, económicos e sociais das acacias invasoras.

O artigo en concreto, citado nesta nova, recolle traballos de ciencia cidadá, traballo de sensibilización realizada por entidades públicas e voluntariado sobre a xestión de especies do xénero Acacia. Cita o proxecto de intervención organizado por Verdegaia desde 2018 coa posta en marcha das Brigadas Deseucaliptazadoras e Desacaciadoras como intervención cívica en áreas forestais de alto risco de incendio co control de especies exóticas invasoras como as acacias.

Podes ler o artigo completo nesta ligazón.

 

 

A Universidade das Nacións Unidas recoñece o proxecto Vemo-nos no Monte!

A Universidade das Nacións Unidas recoñeceu en 2023 o proxecto Vemo-nos no Monte! Educación para a Prevención, Control e Educación sobre Especies Invasoras, como “buque insignia” (flagship) dos proxectos educativos innovadores da Global RCE Network de educación para o desenvolvemento sustentábel.

Vemo-nos no Monte! foi un proxecto transfronteirizo realizado durante 18 meses, entre os anos 2022 e 2023, levado a cabo pola Fundación Montescola, a Fundación CEER (Centro de Estudos Euro rexionais Galicia-Norte de Portugal) e a asociación portuguesa À Escuta, co apoio das Brigadas Deseucaliptizadoras de Verdegaia.

Actividades realizadas dentro do proxecto.

 

 

11 de Febreiro: Entroido deseucaliptizador en Froxán (Lousame)

11 de febreiro: frondosas e filloas en Froxán

No domingo de entroido plantaremos varios centos de castiñeiros, pradairos, sobreiras, ameneiros e freixos no Chán de Avelán, nunha zona na que xa eliminamos o eucalipto e acacia en 2023 e que foi adquirida pola Fundación Montescola co apoio da Deputación da Coruña para a súa rexeneración ambiental e conservación.

A xornada comezará ás 9:30 e convidámosvos a virdes con roupa apropiada para tan asinalada data. Para o xantar de albaroque teremos as célebres filloas de Carmucha. Tamén continuaremos cos traballos de recuperación da Taberna da Revolta Nova, futuro punto de encontro das Brigadas. O punto de encontro será o estacionamento do “Quartel da Revolta” no Chán de Avelán, aonde se pode chegar seguindo as indicacións ao Museu Mineiro San Finx. O lugar da intervención está a poucos metros. Na zona hai tamén un parque infantil.

Para participar é imprescindíbel, alén de estardes inscritas como Brigadistasenviar un correo electrónico a info@montescola.org ata COMO MOI TARDE o xoves día 8 de febreiro. Por favor, inscríbite só se podes vir.

VÉMONOS NO MONTE!

A tua doazón conta!

Serán moi benvidas as doazóns voluntarias e fiscalmente deducíbeis ao proxecto por medio da plataforma Teaming.

3 de Febreiro: Entroido deseucaliptizador en Mondariz-Balneario

3 de febreiro: descascado, roza e plantación

As Brigadas voltan a Mondariz-Balneario o 3 de febreiro para actuar sobre unha parcela de titularidade pública, aínda sen reclamar como mancomún. O obxectivo é continuar coas rogas anteriores: toxo e gromos de eucalipto aproveitaron ben as choivas para avanzar, así com un foco de mimosa. Seguiremos co descascado, roza e tratamento contra a mimosa, ademais dunha primeira plantación de bidueiras.

Para participar é imprescindíbel, alén de estardes inscritas como Brigadistas, enviar un correo electrónico a ester.outr@gmail.com até COMO MOI TARDE o xoves 1 de febreiro. Lembrade que as prazas son limitadas. O punto de encontro é o estacionamento do cemiterio ás 9:30 h. *Se alguén se perde perto de Mondariz, podedes chamar a un dos anfitrións locais (Xacobo): 666858178.

Lembramos ás brigadistas que traian roupa e calzado axeitados para a choiva e o exceso de toxo; luvas, copo, prato e cubertos propios. O albaroque tamén inclúe opción vegana e daremos máis datos unha vez inscritas.

Para participar é imprescindíbel, alén de estardes inscritas como Brigadistasenviar un correo electrónico a info@montescola.org ata COMO MOI TARDE o xoves día 8 de febreiro. Por favor, inscríbite só se podes vir.

VÉMONOS NO MONTE!

A tua doazón conta!

Serán moi benvidas as doazóns voluntarias e fiscalmente deducíbeis ao proxecto por medio da plataforma Teaming.

17 de decembro: a deseucaliptización continúa en Froxán

Logo de varios conatos polo mal tempo neste outono, o domingo 17 de decembro volta a deseucaliptización en Froxán. Estaremos no Chán de Avelán, onde acabaremos de eliminar eucalipto nunha zona de bosque de ribeira adquirida pola Fundación Montescola co apoio da Deputación da Coruña para a súa rexeneración ambiental e conservación (a da fotografía que aparece neste email). Esperamos deixar a zona pronta para plantar en xaneiro e febreiro, e faremos por plantar xa algúns pes pola beira do río.

A xornada, que esta vez esperamos que sexa solleira, comezará ás 9:30. Aplicaremos a técnica de descasque en tocóns e comezaremos os traballos de recuperación da Taberna da Revolta Nova, futuro punto de encontro das Brigadas.

O punto de encontro será o estacionamento do “Quartel da Revolta” (hoxe “Restaurante”) no Chán de Avelán, aonde se pode chegar seguindo as indicacións ao Museu Mineiro San Finx. O lugar da intervención está a poucos metros. Na zona hai tamén un parque infantil.

Para participar é imprescindíbel, alén de estardes inscritas como Brigadistasenviar un correo electrónico a info@montescola.org ata COMO MOI TARDE o mércores día 14 de decembro. Por favor, inscríbite só se podes vir.

Sendo a última roga do ano, lembrámosvos que podedes facer unha doazón recorrente de 1 euro mensual a través de Teaming. A doazón supón unha deducción no IRPF do 80%, polo que para que che desgrave na declaración no próximo ano non deixes de facer a túa doazón antes de acabar o mes.

Se aínda non tes a túa camisola de brigadista, lembra de avisarnos da túa talla no email para que che teñamos unha reservada. Avísanos tamén en caso de restricións alimentarias.

VÉMONOS NO MONTE!

25 de novembro: Lentille, desacaciación e arqueoloxía

A Asociación Veciñal de Lentille convoca as Brigadas Desacaciadoras para, no marco da iniciativa “12 meses, 12 invasoras” de Verdegaia, realizarmos unha nova actuación de control de mimosa (Acacia dealbata) na aldea o sábado 25 de novembro.

Seguiremos avanzando nos novos frentes do Regueiro e Detrás para establecermos corredores libres de acacia cara A Gouxa e Názara.

Para vos apuntardes é imprescindible (alén de estardes inscritos como brigadistas) remitir un email para avlentille@gmail.com até o 22 de Novembro a máis tardar, comprometendo asistencia.

O punto de encontro será o habitual no  Souto  e desde alí repartirémonos en grupos e endereitaremos cara as áreas de traballo. Teredes que estar alí ás 9:30 puntualmente.

Disporemos auga fresca e uns petiscos a media mañán con café, froita e unhas madalenas. Remataremos contra as 14:00 pra xantarmos. Cremiña de verduras e lasagnas, ben sabedes. O albaroque acontecerá na terraza do Cabildo se o clima concorda, e se non habilitaremos o garaxe.

Despois da sobremesa, desprazarémonos á parroquia de Sadurnín (5 min. en carro). Visitaremos o Marco da Eira de Mouros, pena de xisto que contén un dos escasos exemplos de petróglifos na comarca.

Apoiaremos deste xeito a iniciativa de Ecoloxistas en Acción O Ribeiro e da Fundación Montescola quen, coa colaboración do Colectivo A Rula, reclaman unha maior protección e valorización deste extraordinario elemento patrimonial. Recentemente o Consello da Cultura Galega emitiu un informe sobre a necesidade da súa protección.

Clodio González, historiador e Cronista Oficial do Concello de Cenlle ofrecerános in situ unha breve disertación sobre o significado e a historia do Marco.

As prazas son limitadas. Non demoredes en vos apuntar.

Vémonos no monte!

28 e 29 de outubro: bioblitz e deseucaliptización no Barbanza

Na fin de semana do 28 e 29 de outubro o Barbanza énchese de actividades que non vos podedes perder.

I Bioblitz en Froxán

No sábado 28, Froxán (Lousame), será escenario do Primeiro “Bioblitz” que organiza Montescola co apoio da Asociación Galega de Custodia do Territorio e a colaboración da Deputación da Coruña. Un bioblitz é unha festa de biodiversidade na que as participantes deben localizar e identificar tantas especies como sexa posíbel nun espazo determinado, neste caso a Área Conservada de Froxán.

Comezaremos ás 11:00 e acabaremos ás 18:00 logo dunha pausa para comer. Para esta xornada non será necesario inscripción, pois desde a organización ofreceremos viño, auga e café en lugar cuberto ás participantes, mais cada quen deberá traer a súa comida. O punto de encontro (e lugar da comida) é este: https://maps.app.goo.gl/bfgGnsiZgy8MYsQp7  É imprescindible ter instalada a aplicación iNaturalist, pois todas as observacións compatiranse na web do proxecto. Contaremos con varias biólogas/os da AGCT que explicarán o funcionamento da aplicación e resolverán dúbidas ao longo da xornada.

Xornada por un Monte Vivo en Leiro

No domingo 29, as Brigadas únense ás Xornadas por un Monte Vivo que organiza en Rianxo o Laboratorio Ecosocial do Barbanza e a Plataforma pola Defensa do Monte de Rianxo. Nese día participaremos nunha xornada de eliminación de rebentos de eucalipto na CMVMC de Leiro. O punto de encontro será o Centro cultural Vicente Vidal de Leiro e a actividade comezará ás 9:30.

A participación nos traballos comunitarios e o xantar posterior require inscripción. As personas interesadas enviarán un mail a info@barbanzaecosocial.org indicando o seu nome e apelidos, data de nacimiento, teléfono, email, concello de residencia, se desexa asistir ao xantar comunitario e, nese caso, alerxias ou intolerancias alimentarias.

Antes de comer visitarase a  plantación experimental de castiñeiros de Leiro e logo do xantar seguirase unha programación de charlas, festa e música. Podedes consultar o programa aquí, no que tamén se inclúe a xornada do día antes (sábado 28), cunha completa programación no Campo Maneiro de Taragoña.

Vémonos no monte!

7 de outubro: desacaciamos Lentille

Vendima rematada. Adega governada. Na Asociación Veciñal de Lentille queremos estrear o outono cunha nova convocatoria das Brigadas.

O sábado 7 de Outubro botarémonos outra vez contra as mimosas, teimando nas frentes xa habituais e abrindo máis outra. Desta volta, desde as viñas de Detrás porfiaremos por abrir un corredor libre de acacia cara Názara para así seguirmos debilitando o cerco da mimosa á nosa aldea.

Para vos apuntardes é imprescindible (alén de estardes inscritos como brigadistas) remitir un email para avlentille@gmail.com até o 4 de Outubro a máis tardar, comprometendo asistencia e observancia destas instrucións:

O punto de encontro será o habitual no Souto e desde alí repartirémonos en grupos e endereitaremos cara as áreas de traballo. Teredes que estar alí ás 9:00 puntualmente. Disporemos auga fresca e uns petiscos a media mañán con café, froita e algunha caralladiña. Remataremos contra as 14:00 pra xantarmos. Cremiña de verduras e lasagnas, ben sabedes. O albaroque acontecerá na terraza do Cabildo se o clima concorda, e se non habilitaremos o garaxe.

Lembrade traer luvas de traballo, unha garrafiña pra reencherdes con auga e tamén os vosos próprios prato, vaso, culler e garfo, así como calzado axeitado e mesmo unha muda por se, ben por nos mollarmos ben por suarmos de mais, queredes estar máis cómodos á hora do xantar.

Vémonos no monte, Brigadistas!

© 2024: Brigadas deseucaliptizadoras | GREEN EYE Theme by: D5 Creation | Powered by: WordPress